Katiba mpya inayotokana na Rasimu ya Tume ya Mabadiliko ya Katiba iliyoongozwa na Jaji Warioba imeweka muundo wa serikali tatu kwa maana ya Serikali ya Jamhuri ya Muungano na serikali ya nchi washirika yaani Jamhuri ya Zanzibar na Jamhuri ya Tanganyika Rasimu hii ambayo ilikuja kujulikana kama Rasimu ya Katiba ya Wananchi (Rasimu ya Katiba - ya Warioba (PDF)) iliungwa mkono na wananchi walio wengi ingawa ilikuja kuhujumiwa katika Bunge la Katiba na kambi ya chama tawala CCM. Hata hivyo kiu ya watanzania bado ni kubwa ya kupata Katiba Mpya ya Wananchi wenye mfumo wa serikali tatu. Kikwazo moja kikubwa kilichoibuliwa hata kwenye Bunge la Katiba ni kutokuwepo kwa Tanganyika. Ingawa Katiba ya sasa imemeza Tanganyika lakini haina maana nchi mshirika Tanganyika haipo ila haina Katiba yake wala haijapewa hadhi sawa na Zanzibar ambayo ina serikali, mahakama na bunge lake (Katiba ya Zanzibar (PDF)). Kwa mujibu wa tume ya Mabadiliko ya Katiba na rasimu, hatua ambayo ingefuata baada ya kupitishwa kwa rasimu hii ingekuwa kutunga Katiba ya Tanganyika. Na hoja moja kubwa ya waliopinga rasimu hii ilikuwa kwamba katiba ya Tanganyika haipo. Hivyo basi sisi wananchi tumeamua kuandaa rasimu ya Katiba ya Tanganyika kama wazo ili tupate pa kuanzia na tuweze kuweka hadharani Tanzania tuitakayo yenye Tanganyika kama nchi mshirika kwa mujibu wa rasimu ya Warioba. Tukishakubaliana kuhusu Tanganyika basi hakuna kinachozuia Rasimu ya Katiba ya tume ya Warioba kufanyiwa kazi na kuwa Katiba ya Jamhuri ya Muungano wa Tanzania. Rasimu hii ya Katiba ya Tanganyika ina sura 10 na imezingatia mawazo yaliyotolewa kwa tume iliyoongozwa na Jaji Warioba iliyotaka mamlaka irudishwe kwa wananchi kwa ngazi ya chini ya maamuzi. Hivyo kuna sura maalum ya UGATUZI inayorudisha mamlaka kwa wananchi hadi ngazi ya mtaa. Huu si mfumo wa sasa ambao umejificha chini ya TAMISEMI huku maamuzi na bajeti zote ni za serikali ya Muungano. Ugatuzi umefanyika katika sekta zote ikiwemo mahakama, utendaji na uwakilishi lakini hata katika masuala ya ulinzi na usalama, vyombo husika vimesogezwa karibu na wananchi. Haya ni mawazo na kama kawaida yanahitaji maboresho. Tunakaribisha watanganyika wote na wapenda haki kutoa maoni na kushiriki kikamilifu katika kuboresha rasimu hii ili mjadala uanze kuhusu Tanganyika na Tanzania Mpya tuitakayo.
Karibuni!